<
原创沈嘉禄海上梦叠
作者：沈嘉禄
沪语改写：冯济民
诵读：王邦基
文字修正：丁迪蒙
编辑：王乙其
其实，豆芽拨誉为中国饮食个“四大发明”之一，另外三样是豆腐、面筋搭酱。搿四兄弟中，只有酱个年龄最大，其次大概是豆腐，豆芽应该老三。而且酱搭面筋是小麦做个，豆芽搭豆腐个原料是大豆，搿也足可证明我国以农业立国个传统有得几化深远。东汉《神农本草卷》称豆芽为“大豆黄卷”。搿能介算起来已经有得一千七百多年个历史了。
豆芽发明之初可能是用于治病个。《本草》里讲，豆芽主要治疗风湿搭膝盖痛。李时珍勒此基础浪称豆芽为“豆黄”，并介绍了做法：“用黑豆一升，蒸熟，铺席上，以蒿覆之如酱法。待上黄，取出晒干，捣末收用。”搿是一帖中药，主治“湿痹膝痛，五脏不足，脾胃气结积。壮气力，润肌肤，益颜色，填骨髓，补虚损。”因为有“益颜色，补虚损”个功效，后来道家就用豆芽养生了。
豆芽作为素菜吃，大概是勒宋代。《东京梦华录》里称豆芽为“种生”：“又以绿豆、小豆、小麦于瓷器内，以水浸之，生芽数寸，以红蓝草缕束之，谓之‘种生’，皆于街心彩幕帐设出络货卖”。以种生来迎接新春，搿是一种美好个仪式，也可见当时卖豆芽已经成为了一种职业。还有人拿豆芽搭笋、菌并列为素食鲜味三霸。
从烹饪方法来看，宋元辰光豆芽以凉拌为主，明清之后，有做羹搭油炸个，也有用鸡汤搭猪蹄膀汤烫好吃个。现在用汤烫好了吃个也有，比方云南米线个配料当中就有得豆芽，拿豆芽摆到滚烫个鸡汤里向一拌，马上就熟了，而且吃起来仍旧是脆个。现在超市里也有黑豆芽卖，太太买过一趟，炒了以后觉着味道比勿上黄豆芽，嫌老了眼。但是晓得伊个历史之后，还是觉着迭种菜蛮有古意个。
清代，中国个瓷器外销到东南亚搭欧洲，瓷器勒船浪向运输最怕个是碰碎脱。聪明个船员就勒装瓷器个木箱子里一把把个分洒绿豆。机灵个绿豆无孔勿入个钻进瓷器个缝隙里，吃了船员每日天喷淋个水之后，就开始发芽，蹿长，然后，就拿精美个瓷器绕得严严实实。迭能，皮细肉嫩个瓷器就勿怕碰碎了。我还想，勒海浪漂泊个途中，船员拉还可以摘几把绿豆芽炒来吃，补充维生素个勿足。
黄豆芽是老鲜个，大概搭豆芽里有得某种“鲜味素”有关。黄豆芽配开洋搭香干丝一道烧，是屋里向个招牌菜，每趟有亲友到访，常庄拿来招待客人，上桌后几分钟之内一扫而光。黄豆芽炒油豆腐是上海弄堂人家吃惯个家常菜，黄豆芽形状像一柄如意，所以拨称作“如意菜”，油条子呢，像勿像根金条？所以迭两样食材合成个菜就成为过年应景个美味，几乎家家必备。我屋里个惯例是烧一大镬子，装勒大钵斗里，每日天盛一碗回锅加热，麻油一浇，大家侪欢喜吃。
上个周末个大清老早，我搭太太到城隍庙去吃早点，勒春风松月楼吃素交面，勒面汤里吃到几根黄豆芽，心头一喜。因为我晓得素菜馆里有用黄豆芽搭冬笋头吊汤个传统，看来迭个传统现在还呒没拨掼脱。只不过听讲现在孵豆芽侪用激素了，茎粗而根须短，就是个证明，所以味道也大勿像从前了。
——————————————————————————————
作者：沈嘉禄
诵读：王邦基
——————————————————————————————
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
————————————————————————————
欢迎大家
